သူးၸဝ်ႈၼၢင်းသုၸၼ်ႇတီႇ (Sao Thusandi Leadership Award) ပဵၼ်သူးဢၼ်ၸဝ်ႈ ဢိင်းငႄး သႃးၵျိၼ်း (Inge Sargent) ႁွင်ႉၸဝ်ႈၼၢင်းသုၸၼ်ႇတီႇ ၵေႃႉဢၼ်ယၢမ်ႈပဵၼ် မႁႃႇတေႇဝီႇ မိူင်းသီႇပေႃႉ ၶွတ်ႇၽွတ်ႈမႃး မိူဝ်ႈပီ 2008။ သူးၸဝ်ႈၼၢင်း သုၸၼ်ႇတီႇ မီးယိူင်းဢၢၼ်းမွပ်ႈယိုၼ်ႈဢဝ် ၵုင်ႇမုၼ်ၵူၼ်းၼုမ်ႇၼႂ်း ၸိုင်ႈတႆး ၸိူဝ်းတူင်ႉၼိုင်ႁဵတ်းသၢင်ႈၵၢၼ်ငၢၼ်း တွၼ်ႈတႃႇ ၵၢၼ်ပူၵ်းပွင် မိူင်းတႆးႁႂ်ႈၶိုၼ်ႈယႂ်ႇ ႁႂ်ႈမီးလွင်ႈငမ်းယဵၼ် လွင်ႈထၢင်ႇႁၢင်ႈလွတ်ႈလႅဝ်းလႄႈ တီႇမူဝ်ႇၶရေႇသီႇ လႄႈ ၵူၼ်းၼုမ်ႇ ၸိူဝ်းတူင်ႉၼိုင်တႃႇႁၵ်ႉသႃ ၾိင်ႈထုင်းၸိူဝ်ႉၶိူဝ်းၸဝ်ႈၵဝ်ႇ ၼၼ်ႉယဝ်ႉ။

ထိုင်ယၢမ်းလဵဝ် မီးၵူၼ်းၼုမ်ႇဢၼ်လႆႈႁပ်ႉသူး ၸဝ်ႈၼၢင်း သုၸၼ်ႇတီႈ ႁူမ်ႈ 15 ၵေႃႉ။ ၽူႈထုၵ်ႇလိူၵ်ႈ တွၼ်ႈတႃႇ လႆႈႁပ်ႉသူးၼၼ်ႉ တေလႆႈႁပ်ႉငိုၼ်းသူး 4,000 တေႃႇလႃႇ (USD)။

ၸဝ်ႈၼၢင်းသုၸၼ်ႇတီႇ လႆႈသဵင်ႈၵၢမ်ႇသုတ်းမုၼ် ၽွင်း ဢႃႇယုမၼ်းၸဝ်ႈၸမ်ၶွပ်ႈၶူပ်ႇ 91 ပီ မိူဝ်ႈၼႂ်းလိူၼ် ၾႅပ်ႇပဝႃႇရီႇ 2023 ၼႆသေတႃႉၵေႃႈ ယွၼ်ႉပိူဝ်ႈၼႂ်းမၢၵ်ႇႁူဝ်ၸႂ်မၼ်းၸဝ်ႈမႄႈ တိုၼ်းမီးၼမ်ႉၸႂ် ၶႂ်ႈယုၵ်ႉယွင်ႈၵမ်ႉထႅမ် ၵူၼ်းမိူင်းတႆး ၸိူဝ်းတိုၵ်ႉၶတ်းၸႂ်ႁဵတ်းသၢင်ႈတွၼ်ႈတႃႇဝၢၼ်ႈမိူင်း ပေႃးမီးလွင်ႈငမ်းယဵၼ် မီးတီႇမူဝ်ႇၶရေႇသီႇ လႄႈလွင်ႈၶိုၼ်ႈယႂ်ႇမႂ်ႇသုင်ယူႇတႃႇသေႇၼႆၼၼ်ႉ ၵေႃႉဢၼ်ပဵၼ်လုၵ်ႈလၢင်းလႄႈပီႈၼွင်ႉၸိူဝ်ႉၶိူဝ်း ၸိူဝ်းၵိုတ်းဝႆႉပႃႈလင် ၸင်ႇလႆႈမီးလွင်ႈ ယိုၼ်ႈမွပ်ႈမၼ် “သူးၸဝ်ႈၼၢင်းသုၸၼ်ႇတီႇ” Sao Thusandi Leadership Award သိုပ်ႇၵႂႃႇၵူႈပီပီၸွမ်းၼင်ႇၵၢင်ၸႂ်လႄႈလွင်ႈမုင်းမွင်းၸဝ်ႈၼၢင်းသုၸၼ်ႇတီႇ ဢၼ်မီးၼိူဝ်ၵူၼ်းမိူင်းတႆးတင်းသဵင်ႈယူႇယဝ်ႉ။